Covid-19 üzrə tövsİyələr
COVID-19 pandemiyası zamanı başqa ölkələrdən Azərbaycana səyahət
edərkən 18 yaşdan yuxarı sərnişinlər üçün müvafiq ölkə tərəfindən verilən tam
peyvənd olunma (COVID pasportu) və ya sağalma haqqında rəsmi sənəd, və ya
uçuşdan 72 saat öncə alınan mənfi PCR testi təqdim edilməlidir. Test
nəticəsində QR kodunun qoyulması arzuolunandır.
TEZ-TEZ SORUŞULAN SUALLAR
1. COVID-19 virusunun davamlı yayıldığı zamanda Azərbaycana səyahət
etmək təhlükəsizdirmi?
Azərbaycanın paytaxtı Bakı şəhərindəki Heydər Əliyev Beynəlxalq Aeroportu
“Skytrax” beynəlxalq hava nəqliyyatı reytinq agentliyi tərəfindən COVID-19
pandemiyası dövründə epidemioloji təhlükəsizlik üzrə ən yüksək "5 ulduzlu"
reytinqə layiq görülən dünyada beşinci hava limanı olub. Bu, sərnişinlərini və
əməkdaşlarını koronavirus infeksiyasının yayılmasından qorumaq üçün Heydər
Əliyev Beynəlxalq Aeroportunda tətbiq olunan COVID-19 tədbirlərinin
səmərəliliyinin ən yüksək qiymətləndirilməsidir.
2. Azərbaycana səfər etsəm, koronavirusa yoluxma riski ilə üzləşəcəyəmmi?
Azərbaycan Respublikası Nazirlər Kabineti yanında Operativ Qərargah
vəziyyəti nəzarət altında saxlama və virusun yayılmasınını minimuma
endirmək üçün Ümumdünya Səhiyyə Təşkilatı ilə sıx əməkdaşlıq edir. Əmin
olun ki, sakinlərimizin və qonaqlarımızın sağlamlığı və təhlükəsizliyi hər
şeydən önəmlidir, riskləri azaltmaq üçün qabaqlayıcı tədbirlər həyata keçirilir.
Azərbaycan hal-hazırda peyvənd olunma prosesinin ən tez həyata keçirildiyi
ölkələr sırasındadır.
3. Azərbaycana səfər edərkən hansı profilaktik tədbirləri görməliyəm?
Bütün sərnişinlərin səyahətə hazırlaşarkən və ümumiyyətlə COVID-19
virusuna yoluxma riskini azaltmaq üçün Ümumdünya Səhiyyə Təşkilatının
təlimatlarına riayət etməsi tövsiyə edilir. Bütün səyahət edənlər özlərində virus
simptomlarını aşkar edərsə (öskürək, burun axması, hərarət), daim maska
taxmalı və səfərdən öncə həkimə müraciət etməlidirlər. Aşağıdakı tədbirlərin
görülməsi virusa yoluxma riskini qat-qat azaldır:
• Tez-tez əllərinizi sabunla yuyun və ya spirt tərkibli antiseptik vasitə ilə silin;
• Gözlər, burun və ağzınıza toxunmayın;
• Soyuqdəymə və ya qripəbənzər simptomları olan şəxslərlə yaxın təmasdan qaçının;
• Öskürərkən və ya asqırarkən ağzınızı dirsəyinizlə və ya salfetlə örtün, daha sonra həmin salfeti bağlı zibil qutusuna atın;
• Özünüzdə hərarət, öskürək və ya nəfəs darlığı kimi simptomlar aşkar etdikdə, dərhal həkimə müraciət edin.
Azərbaycan Respublikasının ərazisində yeni növ koronavirus (COVID-19)
infeksiyasının insanlar arasında kütləvi yayılmasının qarşısının alınması
məqsədi ilə şəhərlərarası (rayonlararası) və şəhərdaxili (rayondaxili)
sərnişindaşımada istifadə olunan nəqliyyat vasitələrində, bazarlarda, qapalı
ictimaiə-iaşə, ticarət və xidmət obyektlərində, tarix və mədəniyyət abidələri
hesab edilən qapalı məkanlarda, ibadət yerlərində, elm və səhiyyə
müəssisələrində, sosial, mədəniyyət və digər bu kimi qapalı
obyektlərdə tənəffüs yollarını qoruyan fərdi vasitələrdən istifadə edilməlidir.
4. Azərbaycanda turizm obyektləri fəaliyyət göstərirmi?
Ticarət obyektləri, muzey və sərgi zallarının, moll və ticarət mərkəzlərinin
fəaliyyətinə icazə verilir. Şəhərlər və rayonlararası hərəkət bərpa
olunmuşdur. İctimai iaşə obyektlərində müştərilərə yerində xidmət
göstərilməsinə hər gün saat 06:00-dan 00:00-dək icazə verilir.
5. Özümdə hər hansı xəstəlik əlamətləri hiss etsəm, hansı nömrələrlə əlaqə
saxlaya bilərəm?
Bakı daxilində 103, Bakı xaricində 113 və ya 1542 nömrələri ilə əlaqə
saxlamaq lazımdır.